Çəkmərəm "ley-pey"dən əl, "ley-pey"lə canim çıxsa da,
"Ağbaş"a ağ olmaram, min bir ziyanim çıxsa da.
Pivəni tərg eyləyəndən konyaka yar olmuşam,
Xamlığımdan yox əsər, artıq "sənətkar" olmuşam.
Evdə arvad qarşısında o qədər xar olmuşam...
İndi yox arvad-uşaq, təkliklə həmkar olmuşam,
Kimsə yad etməz məni, ahu-fəğanım çıxsa da.
Çəkmərəm "ley-pey"dən əl, "ley-pey"lə canım çıxsa da.
Fırğatı gəlsə vücudum dağ ola tutmaz qərar,
Badeyi-mey qənşərində qamətim dördqat olar.
"İçgiyə sadiq mənəm, sərxoşların tək adı var,-
Məndə içməkdən füzun gillətmək istedadı var"
Pozmaram əhvalımı, gözdən dumanım çıxsa da.
Çəkmərəm "ley-pey"dən əl, "ley-pey"lə canım çıxsa da.
Aləmi-məstlikdə də dümsükləyən var çortumu,
Cəhd edirlər ki, dəyişsinlər kökündən sortumu.
Son zamanlar beynimin lap tərpədiblər qurdunu,-
Bar dönüb çayxanəyə, müflis ediblər yurdumu...
Bu mənəm, hərçənd boşa tez-tez gümanım çıxsa da,
Çəkmərəm "ley-pey"dən əl, "ley-pey"lə canım çixsa da.
İndi canım ağ olur candan əziz cananına,
Çevrilib can sağlığım "sağlıq"ların qurbanına.
Yenə dartır qəlbimi bir qüvvə öz ünvanına...
Dözmüşəm "ley-pey"lərin hər cövrünə, nöqsanına-
Peysərimdən fışqırıb bir vedrə qanım axsa da.
Çəkmərəm "ley-pey"dən əl, "ley-pey"lə canım çıxsa da.
 Çap etmək
|
Müəllif: 
Shop.az
Ödənişli xidmətlər
Sənət dostlarım
Resenziyalar (3)
