Gəlin gəldiyi gündən
özünə yer elədi,
birinə un ələdi,
birinə yer bellədi,
baldıza can söylədi,
qaynına ruh dilədi,
qaynananı əllədi,
qaynatanı yellədi,
yedi. içdi, piylədi...
Aradan az keçmədi,
üzü döndü, nə döndü,
al -qırmızı geyindi,
nəsli ilə öyündü,
qaynanayla deyindi,
qaynın boynuna mindi,
"qaynata, dayan, indi
qapı ağzı sənindi"
düşmən baxıb sevindi.
Əri bir söz deməmiş,
açıldı naqan kimi,
coşdu xuliqan kimi,
cumdu çalağan kimi,
qızardı al qan kimi,
danışdı xaqan kimi,
düşündü nadan kimi,
ağladı nalan kimi,
söküldü palan kimi.
Yeri gəldi -gəlmədi,
hər gün əri yanladı,
xoruz kimi banladı,
uşaq kimi danladı,
yad kimi yamanladı,
çürüdüb çibanladı,
doğrunu yalanladı,
alnını nişanladı,
dilini qaytanladı!
İşə gedirəm deyib
hər gün dirəndi üzə,
işini soxdu gözə,
ev qalmadı o gəzə,
göl qalmadı o üzə,
zibili çıxdı dizə,
Ər vermədi büruzə,
gəlin çıxdı təmizə,
oynadı süzə - süzə!
Bir baxın bu gəlinə,
döş açıq, baldır açıq,
utanmayır azacıq,
Avropa verir qılıq,
intiqrasi xoşqılıq,
düşübdür hay - fısqırıq:
-- Zərif cinsə ağalıq!!
İşlər olubdur fırıq,
Özün saxla, ya Xalıq!
 Çap etmək
|
Müəllif: 
Shop.az
Ödənişli xidmətlər
Sənət dostlarım
Resenziyalar (2)
