Dəvə çinarların pöhrə köşəyi,
Palıd çobanların çəmən döşəyi,
Dünyanın qurd-quşu, iti, pişiyi
Yaman gözəlmiş!
Qızıl dan yerinə səda düşəndə,
Səməndər ürəyim oda düşəndə,
Səhvim vicdanımda yada düşəndə
Yaman gözəlmiş
Qırdıq meşələri, necə əfəlik!
Beş-on turac qalıb, beş-altı əlik.
O qıjı, cincilim, yemlik, əvəlik
Yaman gözəlmiş!
Imzasız bir böhtan oxundu, tfu!
İnsanın adına bir ləkədir bu.
Üçbucaq möhürlü əsgər məktubu
Yaman gözəlmniş!
İndi dünyamızın taleyi bizik.
Paxılın güvənci hiylə, xəbislik.
Yaxşının yamana etdiyi pislik
Yaman gözəlmiş!
Sonsuzluq qorxusu dönər bir yükə,
Gəlin avazıyar qəm çəkə-çəkə.
Alnını qəflətən bürüyən ləkə
Yaman gözəlmiş!
Təzə bir yuvanın təzə dirliyi,
Vüsal paylıların ağızbirliyi,
Üçgünlük çağanın eybəcərliyi
Yaman gözəlmiş!
Ümidin zülmətdə işıq görməsi,
İnsanın qılıqsız salam verməsi,
Yallı köpəklərin qurda hürməsi
Yaman gözəlmiş!
Dünyaya pis demə, insafa gəlmiş,
Bu dünya gözəlmiş,
Yaman gözəlmiş!
Müəllif: Ənvər Rza. 1986.
 Çap etmək
|
Müəllif: 
Shop.az
Ödənişli xidmətlər
Sənət dostlarım
Resenziyalar (1)
