Şirin mürgü döyür çiçəklər, otlar;
Ay gümüş sulara qərq olub batır.
Gecənin nə kövrək, xoş görkəmi var –
Təbiət uyuyur, təbiət yatır!
Təpələr – yastığı, göylər – yorğanı,
Çəmən döşəyidir demə yoxudur;
Kəpəzin, Qoşqarın bomboz dumanı
Onun gözlərinə çökən yuxudur.
Axan bulaqların, çayların səsi
Yatmış təbiətin mışıltısıdır.
O ulduz karvanı, ulduz cərgəsi
Sabahkı arzumun işıltısıdır.
Gözümü çəkmirəm dağdan, dərədən,
Mən ona baxıram özündən xəlvət.
Üfüqdə şimşəklər oynaşır hərdən –
Yuxuda diksinir ana təbiət.
Ulduzlar göylərdə min məclis qurub,
Yerdə, vurulduğum diyar yatıbdır.
Dağlar Koroğludur, keşikdə durub;
O tayda Urmiya – Nigar yatıbdır...
Çöllərin geydiyi məxmərdir, məxmər;
Təpələr veribdir çiyin-çiyinə.
Bu yatan dərələr, bu yatan düzlər
Məni öz yuxumdan oyadıb yenə.
Müəllif: Ənvər Rza.
 Çap etmək
|
Müəllif: 
Shop.az
Ödənişli xidmətlər
Sənət dostlarım
Resenziyalar (0)
