Yazıq canım

Haqq dedim,haqq istədim,getdi qanım,yazıq canım,
Mən nə səhv etdim axı,yazıq canım,yazıq canım.

Zalimin hökmü ilə çoxdan itib haqqın səsi,
Çün dolub-daşmaqdadır haqq istəyənler məhbəsi,
Varlını üstün tutur,mən fağırı,yoxsul kəsi,
Qəbul etmir neyçün Azərbaycanım,yazıq canım.

Dərdimi açdım kimə,Haqqa edir üsyan,dedi,
Gəl dinə,imanə,azdırmış səni şeytan,dedi,
Bildi ki,yoxdur pulum,yox dərdinə dərman,dedi,
Məndən üz döndərdi hətta loğmanım,yazıq canım.

Pul-para bir halda ki,olmuşsa vicdandan baha,
Vallahi,ardır bu cür dövranda ömr etmək daha.
İşdən azad etdilər,qaldı ümidim Allaha,
Rüşvət almırdım,bu imiş nöqsanım,yazıq canım.

Gördülər ki məsləhət,yaltaqlıq et,hörmət qazan,
Mən dedim,ondansa öl mərdanə tək,rəhmət qazan,
Ol səbəbdən çox ayağmın altını xəlvət qazan,
Get-gedə əfsus ki,artır düşmanım,yazıq canım.

Dinimiz yaddan çıxıb,ey iman əhli,dad elə,
İslamın qanunları çoxdan satılmış yad elə,
Ey mənim Sahib-Zamanım,hardasan,imdad elə,
Gəl yetiş,əldən gedir din,imanım,yazıq canım.

Müəlliflər(11) | Qonaqlar (51)