"O"nun şərəfinə! (Sual)

Mən bu qızın gözlərinə
...baxıb-baxıb yorulmadım,
Hər nə qədər gözəldisə
...gözəlliyə vurulmadım...

Diqqətlə bax...
...bir sual var baxışların arasında,
Dalıb-dalıb, qərq oluram
...gözlərinin qarasında...

O sualı tapmaq üçün
...ömür atımı gecə-gündüz
...haralara çapmamışam?!
Amma yenə tapmamışam!

Bu sualdır bəlkə məni o gözlərə bağlayan,
Bu sualın təsirindən
...bəlkə coşur qəlbim mənim
...hansı ki-çaylar kimi çağlayan...

Nə zamandır cavabını axtardığım
-hər qırpımda oğru kimi izlənən,
O sualdır bəlkə mənim eşqimi
...aşkar edib
...amma özü o gözlərdə gizlənən...

Yəqin, mənə həyat verən
...nəfəs verən,
Bir ürəkdə, bir ömürlük, bir nəfərlik qəfəs verən...
Bu kiçicik qəfəsdən də “O”nun könül sarayına bir yol açan,
O sualdır-özü məndən daim qaçan...

Ya Rəbb səndən bir istəyim
...bir arzum var!
İzn vermə o sualı edim aşkar...
O gözlərə baxmaq üçün gecə-gündüz
...yuxularım Ərşə qalxsın
...yatmayım kaş!
O cavabın arzusuyla yaşayıram
...bu arzuya ölənədək çatmayım kaş!

Müəlliflər(13) | Qonaqlar (78)