DataLife Engine > Bayatı > Bayatılar

Bayatılar


29 Avqust 2010. : sekineilyasqizi
Ocağına baxsan yaxşı,
Halalca loxman yaxşı,
Özgənin sarayından
Özünün daxman yaxşı.

Səbrim yoruldu,neynim,
Çox çətin yoldu,neynim,
Yar məni yolda qoydu,
Müxənnət oldu,neynim?

Əzizinəm,yad üstə,
Salma dava yad üstə,
Pisə adətdi,alar
Arvadı arvad üstə.

Bazarda nar satılar,
Hər cürə bar satılar,
Təzə gələndə çox vaxt
Köhnə çölə atılar.

Dağlardan sis gözlənər,
Sobadan his gözlənər,
Yaxşıdan yaxşı əməl,
Pisdən də pis gözlənər.

Çeşmədə balıq olmaz,
Yaxşı analıq olmaz,
Qazanc haramsa,bir gün
Evdə urvalıq olmaz.

Buğda unu çatmadı,
Cad çörəyin yapmadı,
Yaxşını bəyənmədi,
Axır pisi tapmadı.

Hərə bir dövran sürər,
Hərə bir cürə ölər,
Başı gora titrəyə,
Bicdən bic əməl törər.