Bayatılar

Yaxşı gözə gələndi,
Yaman sözə gələndi,
Yolu bulmağa nə var,
Arif izi bulandı.

Qış olmayan yazmı var,
Kül olmayan közmü var,
Gülü ağı söyləyər,-
Bülbül yox,pərvazmı var.

Baş qatıram yaşa, gəl,
Yaş qatıram yaşa,gəl,
Nə yurdam,nə yurdçuyam,
Mənə öyrət peşə,gəl.

Xeyirlə şər birdimi,
Bülbüllə sar birdimi,
Yerdə zülmət,göydə nur,-
Göy ilə yer birdimi?

Gur sellər çaylıq olar,
Hər təndə taylıq olar,
Yardan ayrılan yara
Sevgisi yaylıq olar.

Əzizinəm oxşadım,
Sığalsızı oxşadım,
Başıma duman gəldi,
Dağınamı oxşadım?

Xali torpaq dən istər,
Bitki,ya insan-istər,
Qürbət eldə can verən
Ömür yox,Vətən istər.

Yıxılıb mərdim,neynim,
Qalam,həm sərtim,neynim,
Göz yaşım qurumayır,
Suludu dərdim,neynim.

Əzizinəm,ağlama,
Yox qədərə ağlama,
Yaşın könlümə axır,
Ağladırsan,ağlama.

Yolu bilənə yol ver,
Yoldaş olana yol ver,
Sözün də öz yolu var,
Haqdan gələnə yol ver.

Namərd mərd sevir,oğlan,
Bayquş yurd sevir,oğlan,
Ayıra bilərsənmi?-
Məni dərd sevir,oğlan.

Gül qaldı,tikan dərdim,
Bağrım oldu qan,dərdim,
Yaman yamanlıq etdim,
Yamana könül verdim.

Əziznəm,başdadı,
Başdaşı da başdadı,
Əzrayılın gözündə
Hamı eyni yaşdadı.

Həsrətdən talandım,gəl,
Külündən qalandım,gəl,
Sən yansan sönərəm tək,
Günaha bulandım,gəl.

Müəlliflər(2) | Qonaqlar (186)